في مشاهد البداية اللي قبل الفيلم بيعرف نمير عبد المسيح المخرج المصري الفرنسي نفسه، وبيعرفنا على عيلته اللي بتتكون من أمه وأبوه، ويبدأ يسرد لنا مشاهد من حياتهم اليومية كإننا فرد رابع معاهم في بيتهم. بندخل سوا في التفاصيل ونبدأ نسمع ونشوف حكاية عيلة عبد المسيح من أول ما والده ووالدته تعرفوا على بعض لحد آخر فصل بيجمعنا بيهم
الفيلم مش بس توثيق لعيلة وتحدي للموت والحياة قد ما هو توثيق لمراحل كتير في حياة مصر وفي الحياة عامة. فترات وأحداث وأحكام سياسية وحاجات مرت بيها الناس دي إحنا ممكن نكون سمعنا عنها وممكن لا، بس اللي خلى الحاجة دي مهمة هو صدق نمير في حكيه عن باباه وعن مامته وعن حياتهم وتاريخهم زي ما كانوا، وعلاقته بيهم اللي كانت حقيقي جميلة
البداية كانت سنة 1970 لما خرج والده من السجن وقرر إنه يسافر فرنسا يبدأ حياته من جديد. وتعرف وقتها على والدة نمير وسافروا يعيشوا سوا هناك. بعدها بسنتين جت المفاجأة وهي الحمل في نمير، واللي كانت مفاجأة ممكن تغير كل القدر اللي موجود. وساعتها قرروا إنهم يبعتوا نمير لعمته في البلد في المنيا يعيش عندها لحد ما أوضاعهم تستقر ويقدروا يعيشوا هم التلاتة سوا
ويمكن الفصل ده أكتر فصل حبيته في الفيلم وحبيت مشاعره وصدقه، فحكى نمير مع عمته عن قد إيه الحياة كانت صعبة وفي نفس الوقت جميلة
ناس عايشة في بيوت عادية جدا أو يمكن أقل من العادي. بيوت لسه بتشتغل على وابور الجاز لحد دلوقتي، بدائية جدا، ومع ذلك قدرت عمته إنها تكوّن في نمير شخصية جميلة، قدر بعدها بسنين يرجع ويحكي لنا الحدوتة كلها
ويمكن اللي عجبني في الفيلم هو صدق نمير في الحكي وإنه قد إيه فخور بتاريخه وبحياته وبأسرته، وعنده استعداد إنه يورينا كل التفاصيل من غير رتوش لحد أصعب فصل، وهو فصل الفراق؛ لأن الفيلم كله بيحكي عن إزاي نتقبل الفراق وإزاي نعيش من بعده. إزاي تقدر تعيش حياتك بعد ما تخسر أهم حد فيها، وتشوف لعنة الدنيا من غير بروفات، وقد إيه الوجع ممكن يغير في صاحبه ويخلي الدنيا مالهاش معنى
وعن تجربة شخصية لوجع شبه وجع نمير اكتشفت إن فعلاً قد إيه الحياة متعبة من غير بروفا، ولو في فرصة واحدة بس إننا نعيد حدث واحد مرة تانية، ممكن قد إيه الدنيا تتغير حتى في تقبلنا لمشاعرنا وأفكارنا وحبنا للناس اللي قدامنا. ويمكن زي ما قال هاني الدقاق: عيشوا المشاهد، كل مشهد زي ما يكون الأخير، أشبعوه ساعة الوداع، واحضنوا الحاجة بضمير، ده اللي فاضل مش كتير