ازاي الافلام بتكلمنا

بمناسبة اقتراب نهاية العام و كلنا خلاص بنستعد و بنجهز قوائمنا لأفضل أفلام السنة اللي كانت حلوة في بعض الأحيان و محبطة في الكثير منها، جائت فكرة في خاطري لما شوفت كذا حد بيتكلم على إذا كان افضل فيلم السنة دي هو  Sinners ام One Battle After Another و ليه ناس عجبهم الفيلم ده و ليه ناس عجبهم الفيلم الثانى، و ليه في ناس طلعت في النص قالت إن الفيلمين دول وحشين و مش عارف ازاي انتوا بتحبوا النوع ده من السينما و قام مختار فيلم سريلانكي اهل سريلانكا نفسهم ماسمعوش عنه، الا و هي فكرة هو احنا بنحب الافلام على اي اساس، و جاءتني الإجابة في الجملة التالية ” احنا بنحب الافلام على اساس هي تواصلت معانا ازاي و تفاعلنا معاها ازاي.”

فخليني اتكلم في نطقة ازاي الافلام بتتواصل معانا و بتكلمنا وعلى اي اساس بنحب او بنكره فيلم.

خلينا نقسم الموضوع ده لثلاث نقاط و نتكلم عنهم واحدة واحدة :

• الفيلم

• المشاهد

• تجربة المشاهدة 

الفيلم: لو هنجيب التعريف الأصلي للكلمة فهو شريط بلاستيكي بيتم تسجيل عليه صور متحركة لحكاية قصة معينة، القصة دي بتختلف على حسب نوعها سواء كانت كوميدي، دراما، اكشن، رعب، جريمة، غموض، و انواع تانية كثير. في افلام مش لازم تبقى مقتصرة على نوع واحد من دول، في افلام كثيرة كلنا بنحبها بتبقى هجين بين نوعين او اكثر زي افلام ال  romantic comedy على سبيل المثال وليس الحصر.

المشاهد: المشاهد هو شخص عنده خيارات و أفكار معينة مبنية على طريقة ومكان نشأته في اختيار الأفلام اللي حابب يتفرج عليها بناءا على قاعدة مشاهداته و الاسباب الاخرى المذكورة مسبقا.

تجربة المشاهدة: ههههه، هنا بقى لنا وقفة، عشان تجربة المشاهدة دي بيتحدد على أساسها استقبال المشاهد للفيلم.

خليني استفيض في النقطة دي و اتمنى اتوفق في تحليل الموضوع بشكل سليم و غير ممل، معنى تجربة المشاهدة هو الشكل اللي هيتم مشاهدة الفيلم على اساسه، و بتنقسم لعده انواع:

هل الفيلم ده هتشوفه سينما او streaming و هل هتشوفه لوحدك ام مع حد؟

لكل واحدة من دول تجربة مختلفة على اساسها هتحدد انت خارج من الفيلم ده عامل ازاي، يعني خليني مثلا اضرب مثال لحاجة لسة حالة من قريب مع حفنة من اصدقائي و هما في فيلم و لنا في الخيال حب، كل واحد منهم دخل افيلم في السينما لوحده مش كمجموعة و كل واحد فيهم مر بتجربة مشاهدة مختلفة عن الباقي و لكن الحاجة الوحيدة اللي اجتمعوا كلهم عليها كانت الناس اللي بتضحك و عاملة ازعاج في المشاهد المؤثرة اللي كانت في الفيلم و ده خلى البعض منهم يقول انه ماستمتعش بالفيلم و البعض قدر يفصل افعال الناس المنغصة  و عجبه الفيلم، لدرجة ان احد اصدقائنا راح شاف الفيلم تاني اليوم في حفلة شبه فاضية عشان يقدر يستمتع بالفيلم.

و مع الحديث عن الثلاث امور دول ييجي بقى النقطة اللي انا ذكرتها في البداية، الا وهي ان الافلام ازاي بتتكلم مع مشاهديها، من وجهة نظري ان مع اجتماع كل العناصر المذكورة فوق ، كل واحد بيشوف الفيلم من منظور مختلف، يعني مثلا ممكن نبقى مجموعة داخلين فيلم معين و كلنا ممكن نتفق على الكثير منه و نختلف على تفسير بعض الامور الموجودة فيه.

يعنى على سبيل المثال ، و بما اني لسة شايف الفيلم من قريب، خليني اذكر تفسيري لفيلم  One battle After Another ، انا شايف الفيلم بيتكلم عن اكثر من موضوع و شوفته من اكثر من زاوية ، منهم زاوية الثورة و العنصرية الامريكية، قصة الاب اللي مراته سابته هو و بنته الرضيعة يربيها هو لوحده و بيعيش في حالة تربص و ادمان، و قصة الرجل اللي عاوز يوصل لأعلى منصب في احد الجماعات العليا بأي شكل من الاشكال، و حكاية بنت بتحاول تعيش سنها و فجأة بيتم اختطافها بسبب كون اهلها اشخاص ثوريين زمان و بيحاولوا ينتقموا منهم، و حكاية مدرب الفنون القتالية اللي بنكتشف انه بيساعد اللاجئين و حمايتهم.

دي كل الحاجات اللي قدرت الاحظها و انا بتفرج و لكن انا قررت اتفرج على الفيلم من منظور قصة الاب و البنت ، و ده لم يفسد مشاهدتي للفيلم بس كان ممتع، و ممكن مع اعادة المشاهدة اركز مع شخصية الظابط اللي عملها  Sean Penn و هكذا، و على هذا الاساس انا بشوف ان على حسب انت هتقرر تشوف الفيلم من انهي زاوية و هو هيحكي لك الحدوتة دي من الزاوية دي ازاي، انت هتحب الفيلم او هتكرهه.

يعني مثلا، اغلبنا لما شاف Sinners  سواء سينما او لما نزل على النت، كلنا تقريبا شوفناه كفيلم مصاصي دماء و محاولة الناس اللي داخل الحانة لحماية انفسهم من هذا الهجوم، بعض التفسيرات الأخرى اللي شوفتها انه ازاي انت ممكن تعيش و تجدد في ثقافتك و فنك و انك ممكن تفضل ثابت مكانك و ترفض التقبل، و ده فكرني بالجملة الخالدة من فيلمي المفضل  The Shawshank redemption  لما Andy قال لRed و هما قاعدين “It comes to an end, get busy living, or get busy dying” .

 و ده احد المناظير اللي تم تفسير فيلم  Sinners منها، ان ممكن ثقافة تنغلق على نفسها و مايحصلهاش تطور و ممكن تختلط بالثقافات الاخرى و تطلع بحاجة حلوة و في الفيلم ده اختار اذكى شكل ممكن ، الا و هو الموسيقى، دمج موسيقى ال blues و الR&B ، و الIrish folk بجانب انواع تانية ادى الفيلم طعم حلو اوي و خلاه عالق في ذهني  في أذهان العديد من الناس.

فدي من وجهة نظري المتواضعة نظرتي عن احنا على انهي اساس بنختار افضل فيلم في السنة و افضل فيلم شوفناه عموما في الحياة و في الناهية قوائم افضل افلام السنة بتعتتمد عليك انت و وجهة نظرك انت مش كلام الناسن فأيا كان ايه هو فيلمك المفضل و رقم 1 عندك السنة دي، استمتع به و ماتخليش حد يسلب منك حبك للفيلم ه او يخليك تشك انك اخترت غلط، لإنها في النهاية حاجتك انت مش حاجة الناس.