كيف بدأ السوبر؟
سنة 1885 خرج علينا الفيلسوف الألماني فريدريك نيتشه وهو متعصب وبيقول -بالألماني طبعًا- ملعون أبو الضعفاء، على الأقوياء، على الأغنياء على الفقراء .. المجد للإنسان الأعلى، المجد لسوبرمان.
ودي مكانتش اول مرة يعمل كدا هو كان بالفعل بقاله سنين بينتقد فكرة الإنسان وشايف ان ما خلاص بقا انت ثورة مش عورة، اقلع عباية الاخلاق دي وتحرر، وحاول تتجاوز الموضوع لحد ما تبقى سوبرمان – Übermensch
حتى لو دي كانت اعراض انسحاب بعد ما لو سالومي قالتله خلينا اخوات، بس ده فتح باب لسؤال مهم “مين هو سوبرمان ده أصلًا؟”
طريقة صنع سوبرمان في المنزل في 3 خطوات:
بعد حوالي نص قرن من القلق اللي عمله نيتشه خرج علينا اتنين امريكان براجل لابس البوكسر فوق الهدوم ورافع ايده للسما كأنها اشارة واضحة لمكانه الطبيعي، وقالوا بس، هو ده سوبر مان.
واستغلوا عدم وجود نيتشه في الوقت ده وعملوا عكس اللي كان بيقول عليه:
- بطل أقوى حتى من الطبيعة نفسها، لكنه متمسك بأخلاقها.
- عنده القدرة يبيد البشر في غمضة عين، لكنه بيحميهم.
- بدل ما يكون شيء وجوده يضايق البشر لأنه متحرر من كل قيودهم، أصبح رمز للأمل يخليهم يفهموا ويقدروا قيم زي العدالة، الحب، التسامح وكل الحاجات الي نيتشه قال انها متأكلش عيش دي.
والي خلاه أجمل، ان الموضوع مكانش مفاجئ، سوبر مان اتولد بين الصعاب أصلًاـ
مش بس الصعاب الي واجهت كوكب كريبتون خلت أهله يحدفوه في سفينة للأرض، هو نفسه على الأرض دي اتخلق في ظروف وحشة؛ كساد عظيم، حرب عالمية، نازية تأثيرها على العالم أشهر من النار على العلم:)
في اللحظة دي والناس بتخسر كل حاجة، كانوا محتاجين حاجة تحسسهم بالأمل، وان لسه في فرصة للبشرية إنها تقوم مرة تانية، وده تحديدًا اللي اتعمل عشانه سوبرمان.
ليه Superman 2025 هو أفضل فيلم في التاريخ؟
بعد كلام نيتشه بأكتر من قرن، وبعد العالم ما اتعلق بسوبرمان واعتبره المنقذ الحقيقي في وقت الكساد والمشاكل، ورجع تاني كرهه لما السوشيال ميديا صورته كحد عايز يسلب البشر انسانيتهم، العالم كان محتاج يشوف سوبرمان زي ما الناس في أواخر التلاتينات شافوه.
بطل ملون هينقذ دولة محتلة من احتلال غاشم، وهينقذ طفل صغير من وسط حطام لعمارات وشركات بالمليارات.
بين جملة نيتشه ان البشر لازم يتجاوزوا انسانيتهم وأخلاقهم علشان يكونوا سوبرمان.
وبين فيلم جيمس جن اللي أشهر مشهد فيه كان مشهد لسوبرمان بيدافع عن انسانيته ومشاعره وحقه انه يعيش بين الناس كواحد منهم، كانت ملايين من المشاهد والأمثلة والأدلة ان مستحيل فيلم لسوبرمان يكون وحش.
لأنه ببساطة سوبر مان.
ممكن يقدم أكشن في Superman السبعينات ويرسّخ فكرة الرمز الي مستحيل يتهزم.
وممكن يقدم صراع داخلي سوداوي بين رغبات سوبرمان الداخلية في Superman III.
ممكن يقدم رسالة سياسية زي Superman IV: The Quest for Peace ويكون الصوت الوحيد الي بينادي بالسلام في عالم بيسجد للحرب النووية.
وممكن يقدم منظور فلسفي غامق عن كائن غريب بيحاول يلاقي نفسه بين البشر لأنهم مجرد بشر وهو Man of steel.
أو ممكن يقدم كل دول في 2025 بعد قرن ونص من نداءات التحرر من الأخلاق علشان يقف يواجه نفسه، ويواجه البشر، ويلاقي لنفسه مكان، كل ده بأكتر طريقة ملونة وممتعة على شاشة السينما.
جايز نيتشه لما لجأ لمفهوم السوبرمان كانت وسيلة للهروب من النقد ودفع البشرية خطوة لقدام.
وجايز جو شوستر و جيري سيغل لما ابتكروا سوبرمان كانت وسيلة للرجوع خطوة لورا لإنقاذ البشرية.
لكن الأكيد ان قوة سوبرمان انه استوعب الاتنين، هو سوبر-مان، يقدر يعمل كل حاجة في أي وقت، علشان كدا دي مش مراجعة لفيلم سوبرمان لأن ده تقليل من الفكرة، كل فيلم لسوبرمان هو أفضل فيلم في التاريخ، لو في لحظة من لحظاته حسس طفل مقهور بالأمل، أو رجع ابتسامة حد حاسس بالظلم لما حس ان في بطل خارق يقدر ينقذه.
كل فيلم لسوبرمان هو أفضل فيلم لو رسّخ أكتر لفكرة الأمل الي مش لازم يكون على شكل حرف S على بدلة كائن فضائي طاير للسما، ممكن يكون حرف S في مكان عشوائي في بير العبد بفنجان قهوة في شباك قديم، وهيفضل سوبر.
لأن سوبرمان عمر ما كانت قوته بالبدلة أو إنتاج الأفلام، قوته ان البشر هيفضلوا طول الوقت بيحاولوا يطلعوا خطوة لقدام لفقدان انسانيتهم وهيفضلوا محتاجين حد يرجعهم خطوة لورا للإنسانية دي.
ومحدش يقدر يعمل ده غير لو كان سوبر .. مان.