إللي يخاف من العفريت … يصرفه
ليه بنحب أفلام الرعب؟ لأ ده موضوع كبير وسؤال مش هجاوب عليه النهاردة ، النهاردة إحنا جايين علشان نشوف سنة 2025 قدمتلنا إيه في تصنيف الرعب.
الفكرة الأولى كانت إنها تكون قايمة Top 10 أفضل أفلام رعب في السنة ، لكن وأنا بكتب السطرين دول دلوقت حاسس إن القايمة ممكن تكون ألطف لو ركزنا فيها على أفلام ممكن تكون ما أخدتش حقها من المشاهدة ، أفلام مش شرط تكون أفضل أفلام السنة لكن أكيد هي أفلام بتقدم حاجة مختلفة تستحق إننا نبص عليها بصة.
وعلشان كدة فيه فيلمين كبار قوي هستبعدهم من القايمة دي .. Sinners و Frankenstien .. ووو أيوة دي أفلام على الأقل تصنيف من تصنيفاتها الكتير “رعب”
المهم خلينا نشوف Top 10 …. إيه؟ أروش أفلام رعب في السنة؟ أوك يلا بينا….
10. Together
هتعمل إيه لو صحيت من النوم لقيت شريك حياتك وحب عمرك لازقلك في الرايحة والجاية؟ لازقلك حرفياً ومادياً وفيزيائياً؟ مش مجرد تشبيه يعني!
أحلى حاجة في فيلم Together هي فكرته المجنونة ، صحيح التنفيذ كان يستاهل جودة أعلى من كدة شوية لكن الفكرة هتفضل بايعة نفسها جداً بالنسبالي. كمان فيه تصميم ممتاز لشخصية البطل وعنده back story ممكن تتعمل فيلم لوحدها من كتر حلاوتها.
9. Until Dawn
أنا عندي إعتراف .. أنا بضعف جداً قصاد أفلام التلاعب بالزمن ، ف لما ألاقي فيلم بيجمع بين الرعب والتلاعب بالزمن ف أنا بجد مش قادر أكرهه. الفيلم فوضوي جداً ودمج أنواع وأشكال رعب كتيرة ، والغريب إن الفوضى إللي حصلت بسبب ده كانت لايقة على القصة والأحداث.
بس للأمانة يعني هو الفيلم مليان مشاكل ، يمكن أكبرهم إنه حاول كتير قوي إنه يوضح أسباب الظواهر الغريبة إللي بتحصل وكل ما كان بيحاول أكتر كل ما كان بيخسرني أكتر لأنه لا منه كبر دماغه وركز على عامل المتعة والرعب والدموية ولا منه نجح إنه يشرح السبب ورا إللي بيحصل.
ف بإختصار الفيلم ده للمجانين إللي زيي إللي بيحبوا النوع ده من الأفلام ، ف لو انت / انتي منهم ف أوعدكم بميكس ممتع قوي.
8. The Home
ساعات الجواب مش بيبان من عنوانه ، وساعات بنكون محتاجين نصبر على الفيلم شوية (شويتين تلاتة في حالة الفيلم ده) علشان ناخد تسلسل نهاية من أمتع وأجن وأفضل ما يكون على كل المستويات.
شاب بيعيش حياة مضطربة بيتفرض عليه يشتغل في دار لرعاية المسنين كنوع من الخدمة الإجتماعية ، وهناك بيواجه أحداث كابوسية!!
الفيلم ده فيه من الهدوء إللي بيوصل لدرجة الملل ومن الإثارة إللي بتوصل لدرجة الجنون ، وده ميكس مخليني مش قادر حتى أقول هو فيلم حلو ولا لأ علشان إجابة السؤال بتاع “هل النهاية مهما كانت ممتازة كفاية إنها تنسيني مشاكل الفيلم طوال أحداثه؟” هتفضل متروكة لكل واحد فينا والإجابة هتحدد مدى تقييمك للفيلم.
7. Noise
فتاة صماء نتيجة حادثة قديمة بتتفاجئ بإختفاء أختها بعد معاناتها من أصوات غريبة بتهاجمها في شقتها!
فيلم كوري بأجواء ممتازة ، ومدة زمنية قصيرة قصاد كم الأحداث والشخصيات الموجودة ، الفيلم فيه مشاهد كتير غير مريحة ومرعبة وإتصممت بشكل جيد جداً ، وعامل الغموض إللي سيطر على الأجواء كلها هيخليك مشدود طول الوقت ومش قادر تحدد القلق والتوتر جاي منين ولا منين.
في العموم فيلم جيد جداً ويستاهل المشاهدة.
6. It Feeds
فيلم رعب جيد جداً بشكل مفاجئ ، عن طبيبة نفسية تمتلك قدرة ماورائية بتمكنها من الدخول في عقل مرضاها وبيتعارض طريقها مع كيان شيطاني بيتلبس ضحاياه ويسيطر عليهم ويتغذى عليهم بالمعنى الحرفي!
الفيلم فيه لمحات من Insidious وفكرني برضه في كام مشهد كدة ب أجواء Stranger Things بس الأكيد إنه قدم قصة ممتعة ، صحيح مش جديدة وجوانب كتير فيها مكررة لكن الرتم كان عالي جداً طول الوقت لدرجة إني إتخضيت من كمية الأحداث إللي حصلت قبل حتى ما نوصل لنص الفيلم.
5. Dark Nuns
أي حد حب فيلم Exhuma أعتقد إنه هيحب الفيلم ده جداً ، علشان طول الوقت وأنا عندي إحساس إني بتفرج على جزء تاني منه أو على الأقل بيدور في نفس العالم ، بس الفرق الكبير بينهم بالنسبالي إن Dark Nuns كان غير مشتت ومتماسك أكتر.
القصة بتدور عن إتنين من الراهبات إللي بيتسلموا مهمة لإنقاذ شاب صغير من تلبس شيطاني شديد الخطورة!
الفيلم عبارة عن مهمة ورحلة واحدة والتركيز ده كان من مميزات الفيلم ، كمان التباين الواضح في الإيمان بفكرة التلبس الشيطاني كلها بين الراهبتين كان من عناصر قوة الفيلم وإزاى تقاطع طرقهم والظروف إللي إتحطوا فيها كانت هي الأسباب الوحيدة لإتحادهم في النهاية برغم الإختلاف.
الطقوس الغريبة القائمة على الثقافة اليابانية وتعاملهم مع الكيان الشيطاني كانت مميزة ودي عموماً من الحاجات إللي بحب أشوفها في الأفلام إللي من النوع ده خصوصاً لو كان من إنتاج أسيوي.
الفيلم فيه مشكلة مط وتطويل في نصه وفي تلته الأخير كان سهل قوي تفاديها لكن غير كدة فيلم رعب جيد بيقدّم سيناريو متماسك ومشاهد متعوب عليها وتجربة بصرية جميلة جداً وكيان شيطاني مثير للتوتر ونهاية مؤثرة.
4. Final Destination Bloodlines
بعد 14 سنة من عرض آخر جزء بترجع مرة تانية واحدة من السلاسل إللي معلمة في طفولة معظمنا وسايبة مشاهد أيقونية الكل حافظها حتى إللي متفرجوش على الأفلام هتلاقيهم عارفين مشهد أو اتنين منهم. بس هل الرجوع بعد الوقت ده كله كان بفيلم يستاهل؟
الإجابة وبإختصار: يستاهل جداً جداً ، ده واحد من أحلى أفلام السلسلة بشكل عام. فيلم ممتع جداً وقدّم سيناريو محترم ومشاهد ممتازة وكان واضح إن في عدم إعتمادهم على الأفلام القديمة غير في مجرد لمحات بسيطة جداً إنهم واثقين في نفسهم وفي إللي جايين يقدموه وعايزين يعملوا فيلم قائم بذاته وده كان موفق وفي صالح الفيلم.
المشهد الإفتتاحي هينضم لمشاهد الجزء التاني والتالت بمنتهى السهولة ، مشهد معمول حلو ومرسوم بعناية ومنحنى القصة من بعده أخد منظور مختلف ومنعش.
طبعاً إللي عارف السلسلة عارف إنها قايمة بالكامل على مشاهد القتل وتصميمها ودمويتها ، وهنا المشاهد كلها اتنفذت بشكل كويس قوي وعامل الترقب والتوتر كان حاضر في كل لحظة فيهم.
3. 28 Years Later
أنا من الناس إللي حبت الفيلم ، حبيته بشكل كبير .. ومع عرض الجزء التاني خلال أيام قليلة متهيألي ده وقت مناسب علشان نرجع نفتكره ونتفرج عليه ونكتشف العالم إللي بيحاول يقدمه.
“داني بويل” قدر إنه يجمع بمنتهى العبقرية بين الفوضى والدموية إللي بتميز العالم وبتعرّفه وبين الدراما وعمق الشخصيات وتأسيس عالم جديد مش بيشترك مع عالم الأفلام الأولى غير في المسبب الرئيسي للعدوى لكنه قادر دلوقت إنه يمتد لأجزاء وأحداث أبعد وأكبر.
الفيلم فيه أداءات ممتازة من الكل تقريباً ، وفيه حاجة كمان زادت من جماله وهو شخصية المكان وتصميم الجزيرة وطريقة دخولها والخروج منها والقوانين إللي أهلها بيتعاملوا بيها.
2. Weapons
فيلم Weapons بيتكلم عن ١٧ طفل من نفس الفصل في بلد صغيرة بيخرجوا الساعة ٢:١٧ دقيقة الفجر وبيسيبوا بيوتهم وبيختفوا تماماً من غير ما يسيبوا أي أثر!!
الفيلم أتقسّم على ٦ فصول واضحين تم استخدامهم علشان نحكي عن طريقهم القصة ، وكل فصل فيهم كان بيتتبع شخصية معينة بنحاول نعرف عن طريقها إيه إللي حصل للأطفال دول. وطريقة السرد دي هي السبب إني فضلت مهتم جداً وبحاول أفهم. تغير المنظور كمان بين كل فصل والتاني وتشابكهم مع بعض أضاف متعة كبيرة جداً.
شخصيات الفيلم كانت كتير ومتنوعة واستفادوا جداً من طريقة السرد علشان كل شخصية فيهم تاخد وقتها وحقها على الشاشة.
فيلم حلو وقدّم رعب ودراما وأداءات تمثيلية محترمة وسيناريو ممتاز وطريقة سرد ممتعة وفوق كل ده قصة مثيرة للإهتمام نحب نتفرج عليها ونتابعها .. وآه قدم كوميديا وضحك.
1.Bring Her Back
الفيلم بدأ بتسلسل بداية عظيم حط أساسات لكل حاجة هتحصل ولأجواء الفيلم بشكل عام بمنتهى الذكاء ، بداية ممكن تتقدم في أفلام كاملة ، علشان بعدها نتعرف على بطلين القصة “آندي” و “بايبر” أخ وأخت غير شقيقين بيلاقوا نفسهم مضطرين يعيشوا مع أم حاضنة لمدة قصيرة لحد ما “آندي” الأخ الأكبر يتم 18 سنة.
الفيلم مش بس فيلم رعب قدّم مشاهد وأجواء توصل لدرجة كابوسية وصعب إنها تفارق دماغ أي حد هيتفرج عليه لفترة من الوقت ، ده كمان عمل ده وهو بيرسم خطوط قصة حزينة جداً مفيش حد من الموجودين فيها كسبان.
فيه مرحلة في منتصف الفيلم حسيت إني رجعت لأجواء الفيلم الأرچنتيني When Evil Lurks (وده ترشيح على جنب كدة) وبالتحديد في مشهد معين ضغطت فيه على سناني وخلايا جسمي كلها دخلت في حالة إستعداد للحاجة إللي أنا كنت متأكد إنها هتحصل ولما حصلت كانت أصعب بكتير من أي خيال في دماغى!
“سالي هوكينز” عملت حاجة صعبة قوي وهي إنها برغم كم الإجرام إللي كانت فيه إلا إنها نجحت تخليني متعاطف معاها طول الوقت ، وخلتني أمر بتجربة غريبة جداً كنت فيها متفهم ومقدّر تصرفات شيطانية زي دي!! الفيلم كمان فيه واحد من أفضل الأداءات ل طفل في كل أفلام الرعب إللي اتفرجت عليها.
مرة تانية بنشوف من “الأخوان فيليبو” فيلم بيقول إن لسة عندهم كتير وإن تجربة Talk to Me مكانتش مجرد صدفة ، ومع نهاية الفيلم الإحساس إللي لازمني مكانش إحساس رعب أبداً ، كان إحساس بالحزن ويمكن علشان كدة هو فيلم مختلف.
فاكرين قولنا إيه في الأول؟ أيوة .. دي مش قايمة بأفضل أفلام الرعب في 2025 .. وده معناه إيه؟ مظبوط .. إن قوائمكم أكيد أفضل وأحسن وأروّش بس مش هنعرف ده غير لما تفرجونا عليها 🙂
كل سنة وآنتم طيبين