لفترة مش بسيطة كنت شايف إن الأفلام القصيرة ما هي إلا مجرد وسيلة للمخرج أو المبدع أو أي حد عنده فكرة علشان يعرض أفكاره ، طريقة قليلة التكاليف علشان تكون مدخل ليه لشركات الإنتاج العملاقة علشان تشوف شغله وتقرر إنها تتبنى موهبته أو لأ.
التصور ده أكيد فيه جزء من الحقيقة لكنه برضه تصور قاصر جداً ومش بيدي النوع ده من الفن حقه أبداً .. علشان هو أيوة قد يكون قليل التكلفة مقارنة بالأعمال الطويلة لكنه مش سهل أبداً بأي شكل من الأشكال.
تخيل كدة مطلوب منك تعبر عن فكرة في دماغك في مدة لا تتجاوز ال 10 دقايق مثلاً ، في 10 دقايق مطلوب منك تقول كل حاجة عايز تقولها ، توصل مشاعر وأحاسيس وأفكار ، تتواصل مع المشاهد وتكلمه وتخليه يتواصل مع إللي إنت جاي تقوله. تخيلت؟ ومن هنا بتيجي قوة الأفلام القصيرة وضخامة تأثيرها لأنها سهل جداً تأثيرها يمتد معاك لأضعاف أضعاف وقتها ، ومع سيطرة فكرة إن إللي انت اتفرجت عليه ده إتقدملك في دقايق معدودة الإعجاب والتأمل بيكون أضعاف الأضعاف.
الأفلام القصيرة بقي في حد ذاتها ليها تاريخ طويل وكانت مدخل لمخرجين وفنانين كبار جداً وكانت شاهد على ميلاد مواهب عظيمة ، وأحياناً بتكون وسيلة تجديد وإبتكار ومحاولة للخروج عن المألوف ومش شرط أبداً إنها تكون مقتصرة على أول المسيرة.
حبي للأفلام القصيرة بيكبر يوم عن التاني ، وإحترامي ليها ولصناعها ملهوش حدود . وفكرة إني أرشح عدد محدد من الأفلام حاجة صعبة جداً بس هحاول أخدكم معايا في رحلة من خلال 10 أفلام متنوعين في التصنيف والأسلوب عبر العصور علشان يمكن تسحركم زي ما سحرتني
Night and Fog (1956) .1
البداية مع فيلم صعب شوية .. صعب قوي .. عبارة عن وثائقي عن كوابيس السجون والمعتقلات، هل فيه هدف أو سبب منطقي لكل القتل والجرايم والدمار إللي حصل وبيحصل ولسة هيحصل؟ هل فيه أي أمل إننا نتعلم؟ ولا هنفضل عايشين في حلقة مفرغة بنسأل فيها نفس الأسئلة من غير ردود أوحلول؟
مفيش وصف للفيلم ده غير إنه مجموعة صور كابوسية هتفضل تطارد أحلامي لفترة طويلة جداً! مجموعة صور بتجسد الظلم والإهانة والقسوة والشر المتأصل في الإنسان! مجموعة صور بتحكي إللي محدش بيحب يسمعه وبتقول إللي كلنا بنحاول نتهرب منه طول الوقت! فيلم من الأفلام إللي مستحيل أرجع أتفرج عليه تاني بكامل إرادتي.
La Jetée (1962) .2
30 دقيقة من الفن الخام والأفكار النقية ، رحلة بين الماضي والمستقبل والذكريات والحب والإنسانية والمصير المحتوم!
في رأيي الفيلم ده هو الأب الروحي وحجر الأساس لكل أفلام الخيال العلمي والسفر عبر الزمن ، تجربة مختلفة ومميزة عن طريق مجموعة من الصور الثابتة مع تعليق صوتي. شكل قد يكون غريب على أغلبنا لكن الفيلم مليان معاني جميلة ويعتبر قطعة من الفن الخالص.
The Hand (1965) .3
يعني إيه فيلم بالبساطة دي ومر على إنتاجه 60 سنة ويكون قادر يوصف واقع بنعيشه النهاردة وبنشوفه كل يوم بالشكل المبهر ده؟
التحكم في الفن والإبداع وتوجيهه لخدمة مصالح شخصية وفرض قيود على المبدعين والتحكم في رؤيتهم أو إستغلال موهبتهم لتلميع منتج أو شخص أو حزب أو أياً كان هتفضل علامة على التخلف والرجعية ، حرية النقد والتعبير هتفضل واحدة من أسمى طرق التغيير والتحضر حتى لو للأسف الوصول لده صعب في الأيام إللي بنعيشها النهاردة.
فيلم في حدود 20 دقيقة أعتقد إن مشاهدته مهمة جداً وتفتح أبواب للنقاش والتفكير.
Six Shooter (2004) .4
أول أعمال المخرج الكبير “مارتن ماكدونا” وإللي بيوضح كويس قوي قد إيه هو مهموم بفكرة الحياة والموت وتأثيرهم على بعض من أول يوم ليه ورا الكاميرا.
حوارات ذكية وجذابة وعميقة برغم إنها من بعيد متبانش كدة أبداً ، وبصمات مخرج واعي اتولد كبير هتلاقيها في مستوى الأداءات والكتابة هيخلينا نفهم إن المكانة إللي وصلها النهاردة بأفلامه ورؤيته مكانتش صدفة أو من فراغ.
فيلم فيه طبقات كتير قوي وأكيد مشاهدة واحدة مش كفاية أبداً عليه.
The Life of Death (2012) .5
كام واحد فينا عايش ميت؟ كام واحد القُرب منه شقا والبعد عنه غنيمة؟ كام واحد بيخاف يقرب؟ ولو قرب كام مرة بيطلع عنده حق في سوء ظنه في نفسه؟
عمرك فكرت في الموت على إنه ضحية؟
كل واحد فينا يستاهل يعيش ، يستاهل يحب ويتحب ، يستاهل يشوف أيام حلوة ويعمل ذكريات جميلة. لو حطينا نفسنا مكان بعض الحياة هتبقى أبسط ، هنشوف الطريق أوضح ويمكن يكون أسهل
هل بقى فيلم زي ده يستاهل الترشيح؟ بصراحة مش عارف ، الفيلم حزين جداً وقادر يقلب موودك ويأثر فيك جداً برغم إنه مجرد 5 دقايق سواء عن طريق أفكاره إللي هتهاجمك بمجرد ما يخلص أو عن طريق الموسيقى إللي زودت جرعة الحزن أضعاف.
The Audition (2015) .6
لاحظت دلوقت إن الكآبة كتير قوي في الليست ، ف حبيت أعمل سويتش مفاجئ كدة يغير الموود شويه
عايزين تتفرجوا على سكورسيزي وهو رايق وبيهزر وبيلعب؟ عايزين تشوفوه وهو بيعمل ده مع دي نيرو و ديكابريو وبراد بيت؟ إتفرجوا على ال 15 دقيقة دول.
The Dollmaker (2017) .7
مع بداية أحداث الفيلم هتقول تمام الفكرة مش جديدة قوي وممكن أكون شوفت حاجة شبهها في حلقة من حلقات Black Mirror مثلاً بس هنا ممكن تكون creepy أكتر ، بس مع نهاية الفيلم هترجع تعيد مشاهدته مرة تانية وهتلاقيه بقى creepy أكتر من الأول بكتيييير.
شفت مسائي (Nightshift 2020) .8
الضغط يولد الإنفجار! طب عمرك سألت نفسك كام شخص معندوش رفاهية الإنفجار ده؟ واقع خانق ومستقبل ضبابي ، دايرة مفرغة بيدور فيها شباب زي الورد من غير أي أمل في تغيير ولو بسيط!
بس عارفين إيه ممكن يهوّن؟ كلمة كويسة ، بدل ما بنطلّع همومنا في بعض طول الوقت من غير تمييز ولا تفكير ولا تقدير لتأثير الكلمة. في أوقات زي إللي إحنا فيها ملناش غير إننا نحس ببعض ونحاول نطبطب على بعض على قد ما نقدر. يمكن نكون سبب في تخفيف هموم يوم على شخص منعرفش عنه حاجة.
التعاون الأول بين كريم شعبان ووائل حمدي صناع الفيلم العظيم 6 أيام من بطولة عصام عمر و العظيم أحمد كمال.
The Boy, the Mole, the Fox and the Horse (2022) .9
رحلة بسيطة من أعذب ما يمكن مع طفل بيحاول يلاقي لنفسه مكان. فيلم ساحر بالموسيقى بتاعته ،بمشاعره ، حتى بال quotes إللي بتتقال بشكل مكثف لكن صعب جداً متوصلش الرقة إللي مكتوبين بيها.
فيلم الطفل اتسأل فيه سؤال: What do you want to be when you grow up؟ وإجابته كانت: Kind
Anuja (2024) .10
هل فيه أصعب وأقسى من الفقر؟ وهل فيه أقوى وأصدق من رابط الأخوة؟
الحياة مليانة صراعات بين البرائة والحقارة ، بين الذكاء والغباء ، بين الخوف من المستقبل المجهول وبين التمسك بالفرصة .. بأي فرصة. وأكتر حاجة توجع القلب في العالم الظالم إللي بنعيش فيه إننا نلاقي كل الصراعات المعقدة دي بتتكتب على أطفال مش فاهمين أصلاً ليه مضطرين يعيشوا بالمنظرده؟
في الوقت إللي أبسط حقوقهم إنه يعيشوا سنهم بيلاقوا نفسهم مضطرين يشتغلوا ويتعبوا ويناموا فيالشارع من غير أي إحساس بالأمان ، بيلاقوا نفسهم بيتعرضوا للإستغلال من ناس مش بتفكر غير في نفسها وفي مكاسبها ، بيلاقوا نفسهم قصاد مستقبل مظلم وحاضر قاسي.
بطلة فيلم Anuja مش بس بطلة الفيلم دي كمان بطلة قصتها ، طفلة من أطفال شوارع الهند إللي برغم كم المعاناة إلا إن عندها أطيب وأجمل إبتسامة في الدنيا.
يارب كل أطفال العالم يعيشوا الحياة إللي يستحقوها.
وفي النهاية صحيح الأفلام دي كلها قصيرة .. لكن خلوا حبل النقاشات طويل 😉
